سێدارە – حەمە جەزا

سێدارە
هۆنراوە: شەهید مەلا عەلی (حوسێن مەولوود ئەحمەد)، زیندانی موسڵ
گۆرانیبێژ: حەمە جەزا –

برا دوور و خزم دوور و کەسم دوور
بە نابەڵەد تەمەن ئەمبا بەرەو ژوور
بەڵام ڕوونە، بەرەو سێدارە چوونە
خەنەی خوێنم لە پێ ئەگرێ ئاڵای سوور
خەنەی خوێنم لە پێ ئەگرێ ئاڵای سوور

بەرەو ژووری، بەرەو ژووری سێدارە
ماندووی کردووم و شوێنەکەم شێدارە
کە نیشانەی پەشێوی پێوە شێوەم
ئەوە برینی ئەشکەنجەیە و جێ دارە
ئەوە برینی ئەشکەنجەیە و جێ دارە

گەرچی بەرەو دواماڵی ژین بەڕێوەم
یەکەم ماڵی نەمردنم دیارە لێوەم
بەشم چونکە، مردنی ناو جێ نیە
شادم کە تا دوا هەناسەش بە پێوەم
شادم کە تا دوا هەناسەش بە پێوەم

مەرگی ئاوا ناگۆرمەوە بە سەد ژین
ژینێک سەرم بۆ دوژمن بێ بە پەرژین
سەربەرزییە کە پێڵاوم ئەبینن
بە سەر سەری دوژمنەوە لە بەرزین
بە سەر سەری دوژمنەوە لە بەرزین

نەڵێن ئەمرێ و لە ترسی مەرگ پەشێوە
پێشمەرگە بم، هەر ئەکەومە پێش ئێوە
بە مەرگی پێش مەرگی ئێوە ئاسوودەم
ڕووشم زەردەی پێکەنینی هەر پێوە

ئەگەر لێرە نەمتوانیبێ بجەنگم
لەوێ بەدەست هاوڕێیەکەوە تفەنگم
ئەگەر لێرە بە جێ مابم لە کاروان
لەوێ لە پێش کاروانەوە پێشەنگم

سەرنجێک بنووسە

پۆستی ئەلیکترۆنییەکەت بڵاو ناکرێتەوە. ئەو خانەگەلەی بە * دەستنیشان کراون پێویستە پڕ بکرێنەوە.