×

ڕۆبەرتۆ بێنیگنی لە فلیمی پینۆکیۆدا دەوری ژەپەتۆ دەگێڕێت

کۆمپانیای فلیمسازی ڕاودساید ئەتراکشن یەکەم ترایلەری فلیمی پینۆکیۆی بڵاو کردووەتەوە. ئەم فلیمە وەشانێکی مۆدەڕن لە چیرۆکە ئەفسانەییە کۆنەکەیە،  بە دەرهێنەری ماتیۆ گارۆن و دەورگێڕانی ڕۆبەرتۆ بێنیگنی. فلیمەکە بۆ یەکەم جار لە فەستیڤاڵی نێونەتەوەیی فلیمی بەرلین پیشان درا و سەرنجێکی زۆری ڕخنەگرانی بۆ خۆی ڕاکێشا بە تایبەت بە هۆی گێڕانەوەی بەهێزی  گارۆن و وێنەسازییە خەیاڵی و سوریالییە سەیرەکانی فلیمەکەوە. ڕۆبەرتۆ بێنیگنی براوەی خەڵاتی ئۆسکار (ئۆسکاری باشترین ئەکتەر بۆ فلیمی ژیان جوانە)، دەوری ژەپەتۆ دارتاشی چیرۆکەکە دەگێڕێت و ئەکتەرێکی لاوی نوێ بە ناوی فەدەریکۆ ئیلاپی دەوری پینۆکیۆ کوڕە چێوییەکەی نێو چیرۆکەکە دەگێڕێت کە دەورگێڕانێکی ناوازە و سەرنجڕاکێشە.

فلیمەکە لە شوێنە دڵڕفێنەکانی ئیتالییادا وێنەگری کراوە. جیهانێکی سەرسووڕهێنەر و پڕلە نهێنی و دەورگێڕانی ئەستێرەی سینەما ڕۆبەرتۆ بێنیگینی لە تایبەتمەندییەکانی فلیمەکەن. بێنیگنی دەوری دارتاشە پیرەکە دەگێڕێ کە پینۆکیۆ، بووکەڵەیەکی چێوی، ساز دەکات کە بە شێوازێکی جادوویی زیندوو دەبێتەوە و خولیای بوون بە کوڕێکی ڕاستەقینەی لە سەردایە.  پینۆکیۆی ساوا بە ئاسانی فریو دەخوات و لە گەشت و ئەزموونێکی دۆڕاوەوە دەچێتە نێو ڕێگایەکی هەڵەی دیکەوە؛ لە دونیایەکی سەرسوڕهێنەری پڕ لە بوونەوەری خەیاڵی لە نێو زکی ماسییەکی زەبەلاحەوە تا جیهانی لیستۆکەکان و کێڵگەی موعجیزەکاندا بەردەوام تەفرە دەخوات و دەیڕفێنن.

پینۆکیۆ لە سەر ڕۆمانی گەشتەکانی پینۆکیۆ ی نووسەری ئیتالی کارلۆ کۆلۆدی چێ کراوە؛ ڕۆمانێکی منداڵان کە لە ساڵی ١٨٨٣دا بڵاو بووەتەوە. چیرۆکی ئەم بووکەڵە چێوییە کە گیانی تێ دەچێت ماوەیەکی زۆرە جێگای سەرنج و ئیلهام بووە و لە وەشانی جۆراوجۆردا دەرکەوتووەتەوە و ناودارترین وەشانی، ئەنیمەیشنەکەی دیزنییە لە ساڵی ١٩٤٠دا.

دیزنی بڕیارە وەشانێکی جووڵەی زیندوو1جووڵەی زیندوو (Live Action): چەشنێکی وێنەگرتنی سینەماییە کە بە جێگەی ئەنیمەیشن لە وێنەگری کەڵک دەگرێت. لە جووڵەی زیندوو یان ڵایڤ ئاکشندا مرۆڤ یان ئاژەڵی ڕاستەقینە پیشان دەدرێن نەک بووکەڵە یان نیگارێک کە بە دەست یان کۆمپووتەر نیگار کرابێت. لە پینۆکیۆ بە دەرهێنەری ڕۆبەرت زەمەکیس درووست بکات و لەوانەیە تۆم هانکس دەوری ژەپەتۆی تێدا بگێڕێت کە لە مانگی خەرمانانی ئەمساڵدا پاش خوێندنەوەی فیلمنامەکە پێوەندی بە زەمەکیسەوە دەکات و پێ ڕادەگەیەنێت کە دەیەوێت لە فلیمەکەدا بەشدار بێت. دیزنی دەیەوێت بەردەوام بێت لەسەر ساز کردنی وەشانە ڵایڤ ئاکشنەکانی لە فلیمە ئەنیمەیشنییەکان، پاش ئەوەی کە فرۆشی عەلائەدین و شێرپاشا ملیار دۆلاریان تێپەڕاند.  هەروەها گیلەرمۆ دێل تۆرۆ سەرقاڵی وەشانێکی ئەنیمەیشنییە بۆ نێتفلیکس.

بەگشتی پێ دەچێت ئەم فلیمە بە دەورگێڕانی بینیگنی و جیهانی مۆدەڕن و تاریکتری گارۆن تەنانەت ئەگەر بینەرێکی زۆرتری نەبێت، ستایشێکی زۆرتری ڕخنەگران و بینەران بۆ خۆی کۆ بکاتەوە.

لە یەکەمین ترایلەرەکەدا دەتوانن دەرکەوتنی بێنگینی و فەدەریکۆ ئیلاپی ببینن:

سەرچاوە: IndieWire, Collider

 

سەرنجێک بنووسە

پۆستی ئەلیکترۆنییەکەت بڵاو ناکرێتەوە. ئەو خانەگەلەی بە * دەستنیشان کراون پێویستە پڕ بکرێنەوە.